DVI IMENA; MARKO I FRANE

Kada san još biv dica san se kada got od naših starih čuv beside vrag Marko. To san više puti čuv da se je reklo za nikoga ki je biv zločest, pak se je reklo da je to vrag Marko. Ma koga got bin pitav mi ni znav povidat zač je to. San si misliv, Sv. Marko je evanđelista, pak ne more bit vrag, potari ga sveti križ. Ma barba Rude i barba Tone Protov znaju se, pak znaju i to. Pak su mi povidali.
Va staro vrime da su više puti okupirali Klanu - kot i Istru i Dalmaciju – Mlečani, i čin bi ju okupirali su prinesli z sobu svoje simbole i šoljde, a na simu timu je biv znak sv. Markota. Kako da su bili nevaljati, će reć zločesti, da su najprije njihove šoljde prozvali vrag Marko, i saki ki je biv zločest su mu rekli vrag Marko. Tuliko jih nisu marili, da naši ljudi nisu ni dici teli dajat ime Marko, tako da va Klani su dali ime Luka, Ivan i Matej; tih imen je kuliko ćeš od tih trih evanđelisti, ali od četrtiga, kaj će reć Markota, tiga imena do pred lih ni bilo. Ma to da ni tako bilo samo va Klani, nego sagder kadi je Venecija vladala.
Isto to je i z crikvami. Od ovih trih evanđelisti je se kadi got crikva, ali kapelica, ma sv Markotu ni nigder va naših kraji kadi je Venecija vladala. Morda i je kadi, ali je sigurno naši ljudi nisu zidali.

SVETI FRANJO

Ovo mi je isto danas povidav barba Tone, Antiša iz Studene.

Va Studeni ni navada ditetu dat ime Franjo, ali Frane, pak ni va Studeni bilo nijeniga Studenjca s tin imenon. Ma to više iz straha da nisu dajali to ime.
Nikada va staro vrime da su Studenjci na dan sv. Antona pred sudon i pred rotu prisegnili da je polje njihovo. Tako da su dali prisegu da stoje na svoji zemlji, kaj je i bilo istina, aš su si va postole dili zemlju iz svojih vrti. Ma sv. Ante je Franjevac, će se reć baštinik sv. Franjota.
Njihov glavar da je biv jako uman i pobožan čovik, ma pobožan na svoj način. Mi se vidi da je on i svece doživiv kot obične ljude, a ne kot svece, pak da je govoriv: "Sveti Ante nan je pomogav, aš je zažmav i se je držav da niš ne vidi i ne čuje se vrime dokljer su suci i rota bili tu, ma ne znan bi li biv zažmav njegov učitelj, sv. Franjo. Najbolje će bit da mi sv. Franjota pustimo na miru za eno vrime dokljer se to ne pozabi. Ni triba ni spominjat njegoviga imena, pak neće ni on abadat na nas ni na naše polje."
I tako da se od onda ne daje ime Franjo dici na Studeni. Ma od onda je pasalo već puno puno lit i mi se vidi da se već more dat dici to lipo ime.

Zapisav Josip Gržinčić